Ágætu félagar,
Þegar tveir deila um réttinn til ákveðins léns getur komið upp sú staða
að yfirvöld þurfi að skera úr um hvor deiluaðila hafi meiri rétt. Þessi
ferill tekur oft langan tíma, og því er nauðsynlegt að hægt sé að koma
í veg fyrir að umdeilt lén sé umskráð á þriðja aðila meðan á kæruferli
stendur.
ISNIC hefur því komið upp möguleika á að læsa skráningarupplýsingum
léns meðan á kæruferli stendur (e. registry-lock/dispute-lock). Sá sem
fer fram á læsingu þarf að skila staðfestum upplýsingum um framlagða
kæru áður en læsing er samþykkt.
Við leggjum því til eftirfarandi viðbætur við skráningarreglur .is léna:
-----------------------------------------------------------------------
Við 1. grein bætist skilgreining
1.1.17 Læst lén
Upplýsingum um rétthafa og tengiliði léna sem merkt eru læst
í rétthafaskrá ISNIC er ekki hægt að breyta á meðan á læsingu stendur.
Við bætist ný 12. grein:
12. Læsing léna
12.1 Aðilar að ágreinismáli um lén sem þegar er skráð hjá ISNIC geta,
að ákveðnum skilyrðum uppfylltum (sjá 12.4), farið fram á að ISNIC læsi
skráningarupplýsingum léns sem deilt er um. Sá sem fer fram á læsingu er
læsingarbeiðandi og sá sem sæta þarf læsingu er læsingarþoli.
12.2 Læst lén heldur tæknilegri virkni en hvorki er hægt að breyta
upplýsingum um rétthafa þess né tengiliði. Mögulegt er að flytja læst
lén milli vistunaraðila.
12.3 Læsingarbeiðandi skráir læsingabeiðni rafrænt hjá ISNIC og greiðir
læsingargjald skv. gjaldskrá ISNIC hverju sinni. Samhliða slíkri beiðni
þarf að leggja fram afrit af framlögðum kærugögnum til þartilbærs aðila
(sjá 12.4).
12.4 ISNIC tekur til greina beiðni um læsingu léns, sé hún studd gögnum
um framlagningu kæru fyrir
a) íslenskum dómstólum
b) neytendastofu
c) úrskurðarnefnd ISNIC
d) öðrum aðila, sem á hverjum tíma telst bær til að úrskurða í viðkomandi
máli.
12.5 Læsing léns gildir í 6 mánuði, en fæst framlengd einu sinni til
6 mánaða án nýrrar umsóknar liggi þá fyrir gögn um að mál sé til meðferðar
og að niðurstöðu sé að vænta innan 6 mánaða. Sé deila enn óleyst að tólf
mánuðum liðnum þarf læsingarbeiðandi að sækja aftur um læsingu á léninu
og leggja fram ný gögn sem sýna að deilan sé enn til formlegrar meðferðar
hjá þartilbærum aðila.
12.6 Læst lén er umskráð á læsingabeiðanda ef
a) læsingarþoli samþykkir að afskrá lénið,
b) læsingarþoli verður ekki við úrskurði eða dómi um að afskrá lénið eða
umskrá það á læsingarbeiðanda.
12.7 Lén sem skráð er á læsingarbeiðanda í framhaldi af dómi eða úrskurði,
telst nýskráð frá þeim degi sem dómnum eða úrskurðinum er framfylgt
hjá ISNIC.
12.8 Náist sættir milli aðila meðan á læsingu léns stendur, skráir
læsingarbeiðandi það rafrænt hjá ISNIC og lýkur þar með læsingu þess
sjálfkrafa. Læsingargjald er ekki endurgreitt.
----------------------------------------------------
Vinsamlega sendið athugasemdir/aðfinnslur/breytingar ef þið hafið einhverjar....
--
Marius Olafsson
ISNIC ltd. http://www.isnic.is
Hofdatuni 2 +354 525 4747
Reykjavik ICELAND marius(a)isnic.is
