Ágætu netverjar, um leið og ég sendi ykkur slóð á drög að nýjum reglum um úthlutun léna undir .is langar mig að fylgja drögum úr hlaði með nokkrum orðum. Við samningu nýrra reglna hefur stjórn ISNIC m.a. litið til þess að um er að ræða þjóðarlén og því ætlað til notkunar af íslendingum umfram aðra. Stjórnin hefur þá haft til hliðsjónar ábendingar sem fram hafa komið á póstlista domain@lists.isnet.is Meðfylgjandi drög voru samþykkt efnislega af stjórn ISNIC 20. nóvember s.l.; þau hafa verið yfirfarin og lagfærð hvað orðalag snertir síðan. Stefnt er að nýjar reglur taki gildi 1. desember n.k. Vandasamt er að semja reglur þannig að ekki sé unnt að túlka þær á fleiri en einn máta. Þetta er þó væntanlega veganesti sem reglusmiðir fara af stað með. Það er von stjórnar ISNIC að meðfylgjandi drög séu skýr og túlkunaratriði sem fæst. Með birtingu draga nú fylgir sú ósk að netverjar gaumgæfi texta og sendi athugasemdir á póstlistann ef tilefni þykir til. Nýjar reglum eru í mörgu frábrugðnar reglum sem í gildi eru nú. Of langt mál væri að koma að öllum breytingum en þær helstu eru þessar: a) skilgreiningar fylgja nú reglum. Vert er að benda sérstaklega skilgreiningu á "rétthafa" og "stjórnunarlegum tengilið" b) í kafla um umsókn um lén er greint á milli íslenskra umsækjenda og erlendra. Eins og sjá má er erlendum umsækjendum þrengri skorður settar en innlendum umsækjendum enda um þjóðarlén að ræða. c) reglur um ferli varðandi úthlutun léna eru í megindráttum óbreyttar frá þeim sem nú gilda utan þess að rétthafa er nú skylt að hlýta úrskurði sérstakrar úrskurðarnefndar léna í kærumálum. d) í kafla um tæknilega uppsetning léna er að finna nýtt skilyrði er varðar skráningu nafnaþjóna. e) í köflum um breytingu á vistun léna og umskráningu er sérstaklega bent á að beiðni um slíkar breytingar verða að koma frá stjórnunarlegum tengilið léns. Rétthafi getur ekki farið fram á þessar breytingar beint til ISNIC. f) í kafla um greiðslur léngjalda er nýmæli að greiða þarf gjöld fyrirfram. g) í kafla um brottfall léna er sérstaklega bent á að lén er afmáð í framhaldi af greiðslufalli árgjalda. h) kaflar 9-11 fjalla um úrskurðarnefnd léna. Úrskurðarnefnd er nýmæli. Við reglusmíð hefur verið stuðst við sambærilegar erlendar reglur en reynt að gæta þess að valdsvið nefndarinnar sé ekki ótakmarkað. i) ábyrgð ISNIC er tíunduð í 12. kafla. j) tvö bráðabirgðaákvæði eru tiltekin. Það fyrra þarfnast ekki skýringa. Hið síðara er ætlað bæði ISNIC og viðskiptavinum enda eðlilegt að í einhverjum tilfellum þurfi aðlögunartíma að breyttum greiðslumáta. Hér hefur aðeins verið tæpt á helstu atriðum er varða breytingar frá núverandi reglum um skráningu og úthlutun léna. Regluverkið allt þarf að skoða í samhengi til að fá heildarmynd af nýju umhverfi sem reglurnar skapa. Sjá drög að nýjum reglum: http://www.isnic.is/is/reglur.html Kveðja, Helgi -- Helgi Jonsson, Director hjons@isnic.is Internet Iceland - ISNiC Taeknigardur phone +354-525-4950 Dunhagi 5 fax +354-561-0999 IS-107 Reykjavik Iceland homepage www.isnic.is